រដ្ឋមន្ត្រីក្រសួងការបរទេសចិន លោក វ៉ាង យី (Wang Yi)បានរិះគន់ការអះអាងរបស់រដ្ឋមន្ត្រីការបរទេសអាម៉េរិកអំពីការបរាជ័យនៃការទំនាក់ទំទងជាមួយចិន
រដ្ឋមន្ត្រីក្រសួងការបរទេសចិន លោក វ៉ាង យី (Wang Yi)បានរិះគន់ការអះអាងរបស់រដ្ឋមន្ត្រីការបរទេសអាម៉េរិកអំពីការបរាជ័យនៃការទំនាក់ទំទងជាមួយចិន
ភ្នំពេញ៖ ចេញផ្សាយ ថ្ងៃព្រហស្បតិ៍ ២រោច ខែស្រាពណ៍ ឆ្នាំជូត ទោស័ក ព.ស ២៥៦៤, ត្រូវនឹងថ្ងៃទី៦ ខែសីហា ឆ្នាំ២០២០។
រដ្ឋមន្ត្រីក្រសួងការបរទេសចិនលោក វ៉ាង យី (Wang Yi) កាលពីថ្ងៃពុធទី៥សីហាបានរិះគន់យ៉ាងខ្លាំងចំពោះ ការអះអាងរបស់រដ្ឋមន្ត្រីបរទេសអាម៉េរិកលោក ម៉ៃ ផមផេវ ដែលថាគោលនយោបាយនៃការទាក់ទងជាមួយចិនដែលត្រូវបានធ្វើដោយរដ្ឋបាលអាម៉េរិកមុនៗជាបន្តបន្ទាប់មកនោះ បានបរាជ័យ។
លោក វ៉ាង យី បាននិយាយនៅក្នុងបទសម្ភាសន៍មួយជាមួយសារព័ត៌មានស៊ីនហួរថាការអះអាងនេះ គឺគ្រាន់តែជារបៀបនិយាយបែបថ្មីនៃចិត្តគំនិតសង្គ្រាមត្រជាក់ប៉ុណ្ណោះ។
លោក វ៉ាង យី បាននិយាយថា ការអះអាងនេះគឺជាការបិទភ្នែកមើលមិនឃើញចំពោះអ្វីដែលសម្រេចបាននៅក្នុងទំនាក់ទំនងចិន-អាម៉េរិកអស់រយៈច្រើនទស្សវត្សរ៍កន្លងមកនិងបង្ហាញការមិនយល់ដឹងទូលំទូលាយនៃវឌ្ឍនភាពជាប្រវត្តិសាស្ត្រនិងកង្វះការគោរពដល់ប្រជាជនចិននិងអាម៉េរិក។
លោកបាននិយាយថា នេះជាវីរុសនយោបាយដែលត្រូវបានចោទសួរនិងស្តីបន្ទោសដោយប្រជាជននៅសហរដ្ឋអាម៉េរិកនិងសហគមន៍អន្តរជាតិ។
ដោយសុំអោយប្រទេសទាំង២ប្រកាន់ខ្ជាប់នូវគោលការណ៍នៃការគោរពគ្នាទៅវិញទៅមកនិងស្វែងរកមូលដ្ឋានរួមគ្នា ហើយដាក់ការខ្វែងគំនិតនៅដោយឡែកនោះ លោកបន្ថែមថា រយៈពេលជាង៤ទស្សវត្សរ៍កន្លងទៅនេះក្រុមមេដឹកនាំនៃប្រទេសចិននិងសហរដ្ឋអាម៉េរិកបានចាប់ដៃគ្នាឆ្លងកាត់មហាសមុទ្រប៉ាស៊ីហ្វិចដ៏ធំល្វឹងល្វើយ។ ក្នុងរយៈពេលជាង៤០ឆ្នាំមកនេះនិងច្រើនជាងនេះចាប់តាំងពីប្រទេសទាំង២បានឈានដល់ទំនាក់ទំនងការទូតនោះ ប្រជាជនចិននិងអាម៉េរិកជាច្រើនជំនាន់បានធ្វើការជាមួយគ្នាដើម្បីជំរុញលើកស្ទួយទំនាក់ទំនងចិន -អាម៉េរិក។
លោក វ៉ាង យី បានបន្ថែមទៀតថាជាលទ្ធផលនោះចំណងទាក់ទងទ្វេភាគីបានក្លាយជាទំនាក់ទំនងមួយដែលមិនអាចបំបែកបាននិងជ្រាលជ្រៅបំផុតនៅលើពិភពលោកដោយផ្តល់កិច្ចសហប្រតិបត្តិការទូលំទូលាយនិងផលប្រយោជន៍រួម។ «គ្មាននរណាម្នាក់អាចបដិសេធការពិតទាំងនេះបានឡើយ។នរណាដែលប៉ុនប៉ងបំផ្លាញដំណើរការនេះ ចុងបញ្ចប់នឹងបរាជ័យ»៕
————————————————————–
ប្រវត្តិការទូតដំបូង រវាងសហរដ្ឋអាមេរិក និងចិនដីគោក
ខែតុលាឆ្នាំ ១៩៤៩
សាធារណរដ្ឋប្រជាមានិតចិនបានបង្កើតឡើង
មេដឹកនាំបក្សកុម្មុយនីស្តចិនលោកម៉ៅសេទុងបង្កើតសាធារណរដ្ឋប្រជាមានិតចិននៅទីក្រុងប៉េកាំងនៅថ្ងៃទី ១ ខែតុលាបន្ទាប់ពីពួកកុម្មុយនិស្តដែលគាំទ្រដោយកសិករបានផ្តួលរំលំរដ្ឋាភិបាលជាតិនិយម(Chiang Kai-shek)។ (Chiang ) និងកងទ័ពរាប់ពាន់នាក់របស់គាត់បានភៀសខ្លួនទៅកាន់តៃវ៉ាន់។ សហរដ្ឋអាមេរិកដែលគាំទ្រក្រុមអ្នកជាតិនិយមប្រឆាំងនឹងការឈ្លានពានរបស់កងទ័ពជប៉ុនក្នុងសង្គ្រាមលោកលើកទី ២ គាំទ្ររដ្ឋាភិបាលសាធារណរដ្ឋចិនដែលនិរទេសខ្លួននៅ(Chiang)ដោយបានបើកឆាកសម្រាប់ទំនាក់ទំនងដែលបានកំណត់ដោយសហរដ្ឋអាមេរិកជាមួយចិនដីគោក។
Source: www.rasmeinews.com
