ការចុះហត្ថលេខារបស់បារាំង ជាមួយនឹងក្រសួង ការពារជាតិកម្ពុជា ក្នុងការជួយបណ្តុះបណ្តាល ភាសាបារាំងដល់កងកម្លាំងមួកខៀវកម្ពុជា
ការចុះហត្ថលេខារបស់បារាំង ជាមួយនឹងក្រសួង ការពារជាតិកម្ពុជា ក្នុងការជួយបណ្តុះបណ្តាល ភាសាបារាំងដល់កងកម្លាំងមួកខៀវកម្ពុជា
ភ្នំពេញ៖ ចេញផ្សាយ ថ្ងៃសៅរ៍ ៨រោច ខែជេស្ឋ ឆ្នាំជូត ទោស័ក ព.ស ២៥៦៤, ត្រូវនឹងថ្ងៃទី១៣ ខែមិថុនា ឆ្នាំ២០២០។
ស្ថានឯកអគ្គរដ្ឋទូតបារាំងប្រចាំកម្ពុជា បានឈានដល់ការចុះហត្ថលេខាជាមួយនឹងក្រសួង ការពារជាតិកម្ពុជា លើអនុស្សរណៈស្តីពីកិច្ចសហប្រតិបត្តិការ ក្នុងការជួយបណ្តុះបណ្តាល និងបង្រៀនភាសាបារាំងដល់កងកម្លាំងមួកខៀវកម្ពុជា និងកិច្ចសហប្រតិបត្តិការរវាងកងរាជអាវុធហត្ថ នៃកងយោធពលខេមរភូមិន្ទ និងកងរាជអាវុធហត្ថសាធារណរដ្ឋបារាំង។ ពិធីចុះហត្ថលេខានេះ បានធ្វើឡើងកាលពីថ្ងៃទី១១ ខែមិថុនា ឆ្នាំ២០២០ នៅអគារមិត្តភាព ទីស្តីការគណៈរដ្ឋមន្ត្រី ដោយមានការអញ្ជើញចូលរួមរបស់ឯកឧត្តម នាយឧត្តមសេនីយ៍ នាង ផាត រដ្ឋលេខាធិការប្រចាំការ ក្រសួងការពារជាតិ និងលោកជំទាវ អ៊ីវ៉ា ង្វៀនប៊ីន (Eva NGUYEN BINH) ឯកអគ្គរដ្ឋទូតបារាំងប្រចាំកម្ពុជា។
ឯកឧត្តម នាយឧត្តមសេនីយ៍ នាង ផាត បានមានប្រសាសន៍ថា ក្រសួងការពារជាតិកម្ពុជា មានកិត្តិយសណាស់ ដោយបានការចុះហត្ថលេខាជាមួយសាធារណរដ្ឋបារាំង នៅលើអនុស្សរណៈស្តីពីកិច្ចសហប្រតិបត្តិការ រវាងកងទ័ពនៃប្រទេសទាំងពីរ។ ឯកឧត្តម នាយឧត្តមសេនីយ៍បានបញ្ជាក់ថា តាមការពិតអនុស្សរណៈដែលត្រូវចុះមានចំនួនបី តែយើងចុះលើអនុស្សរណៈចំនួនពីរសិន ដែលអនុស្សរណៈទីបី យើងកំពុងពិចារណា ពិភាក្សាបន្តទៀត ដើម្បីដំណើរការនៅពេលក្រោយ។ ឯកឧត្ដម នាយឧត្តមសេនីយ៍ នាង ផាត បានសម្តែងនូវការស្វាគមន៍ និងវាយតម្លៃខ្ពស់ចំពោះលោកជំទាវ ឯកអគ្គរដ្ឋទូតបារាំងប្រចាំកម្ពុជា ដែលបានខិតខំបំពេញបេសកកម្មការងារការទូតនៅកម្ពុជា និងឈានដល់ការចុះហត្ថលេខាលើកិច្ចសហប្រតិបត្តិការ រវាងកងទ័ពនៃប្រទេសយើងទាំងពីរ កម្ពុជា និងបារាំង នាពេលនេះ។ ឯកឧត្តម នាយឧត្តមសេនីយ៍សង្ឃឹមថា នៅពេលខាងមុខនេះ ចំណងមិត្តភាព សាមគ្គីភាព និងកិច្ចសហប្រតិបត្តិការ រវាងប្រទេសទាំងពីរ និងកងទ័ពទាំងពីរ នឹងត្រូវបានពង្រឹង និងពង្រីកទ្វេឡើងបន្ថែមទៀត។
លោកជំទាវ អ៊ីវ៉ា ង្វៀនប៊ីន (Eva NGUYEN BINH) ឯកអគ្គរដ្ឋទូតបារាំងប្រចាំកម្ពុជា បានលើកឡើងថា ការចុះហត្ថលេខាជាមួយគ្នានាពេលនេះ គឺពិតជាមានតម្លៃ និងមានសារៈសំខាន់បំផុត ចំពោះកិច្ចសហប្រតិបត្តិការ រវាងសាធារណរដ្ឋបារាំង និងព្រះរាជាណាចក្រកម្ពុជា។ លោកជំទាវឯកអគ្គរដ្ឋទូតបានបន្ដថា នេះគឺជាកិច្ចខិតខំប្រឹងប្រែងផងដែររបស់ភាគីបារាំង ចំពោះការចេញប្រតិបត្តិការរបស់កងកម្លាំងមួកខៀវកម្ពុជា នៅក្នុងក្របខ័ណ្ឌរបស់អង្គការសហប្រជាជាតិ និងកិច្ចសហប្រតិបត្តិការរបស់បារាំង ជាមួយនឹងកងរាជអាវុធហត្ថកម្ពុជា។ លោកជំទាវក៏បានចូលរួមរំលែកទុក្ខចំពោះក្រុមគ្រួសារកងទ័ពមួកខៀវកម្ពុជា ដែលបានទទួលមរណភាពនៅក្នុងប្រទេសម៉ាលី ដោយសារជំងឺកូវីដ-១៩នាពេលកន្លងមកនេះ។ លោកជំទាវឯកអគ្គរដ្ឋទូតបារាំងបានបន្ថែមថា ជំងឺកូវីដ-១៩នេះ មានឥទ្ធិពលអាក្រក់សម្រាប់ការបំពេញបេសកកម្មរបស់កងកម្លាំងមួកខៀវកម្ពុជា រួមនឹងការផ្លាស់ប្តូររបស់កងទ័ពកម្ពុជានាពេលខាងមុខ។
លោកជំទាវបានបន្ថែមទៀតថា នាពេលឆាប់ខាងមុខនេះ នឹងមានការបង្រៀនភាសាបារាំងឡើងវិញ នៅក្នុងវិស័យកងទ័ពកម្ពុជា ដែលយើងនឹងសង្ឃឹមថា នឹងអាចចាប់ផ្តើមនៅក្នុងខែតុលាខាងមុខនេះផងដែរ ៕
