ខេត្តកណ្តាល៖ ស្នងការដ្ឋាននគរបាលខេត្ត បានចុះស្រាវជ្រាវករណីរបស់ពលរដ្ឋរាយការពីម្ចាស់អាជីវកម្មដឹកដីបណ្តាលអោយ បែកភក់ រអិល ពិបាកធ្វើដំណើរ
ភ្នំពេញ៖ ចេញផ្សាយ ថ្ងៃអាទិត្យ ១១រោច ខែជេស្ឋ ឆ្នាំឆ្លូវ ត្រីស័ក ព.ស ២៥៦៥, ត្រូវនឹងថ្ងៃទី ៦ ខែ មិថុនា ឆ្នាំ២០២១។
ខេត្តកណ្តាល៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល សូមបំភ្លឺឆ្លេីយតបទៅនឹងការចូលផ្ញើសាររបស់ប្រជាពលរដ្ឋ សុំមិនបញ្ចេញឈ្មោះ ក្នុងប្រអប់សារផេកស្នងការដ្ឋាននគរបាលខេត្តកណ្ដាល មានខ្លឹមសារថាៈ ខ្ញុំបាទសុំមេត្តាមិនបញ្ចេញឈ្មោះ សូមរាយការណ៍ពីស្ថានភាពផ្លូវមួយខ្សែនៅភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្ដាល ដែលមានការបែកភក់ រអិល ពិបាកធ្វើដំណើរ ពេលភ្លៀងធ្លាក់ ដោយសារមានក្រុមរថយន្តដឹកដី ធ្លាក់រាយប៉ាយពាសពេញផ្លូវ សូមលោកស្នងការមេត្តាជួយសម្រួលដោយក្តីអនុគ្រោះផង។ ក្រោយពីទទួលបានព័ត៌មានខាងលេីរួច និងមានការចង្អុលបង្ហាញពីក្រុមការងារប្រតិកម្មរហ័សខេត្ត លោកវរសេនីយ៍ឯក ឯក លន់ អធិការនគរបាលស្រុកមុខកំពូល បានបញ្ជាអោយសមត្ថកិច្ចជំនាញសណ្ដាប់ធ្នាប់ចរាចរណ៍ និងប៉ុស្តិ៍នគរបាលរដ្ឋបាលសំបួរមាស ចុះពិនិត្យស្រាវជ្រាវករណីខាងលើ។ ជាលទ្ធផល ៖ នៅរសៀល ថ្ងៃទី០៦ ខែមិថុនា ឆ្នាំ២០២១ វេលាម៉ោង១២ និង៣០នាទី សមត្ថកិច្ចជំនាញ និងប៉ុស្តិ៍នគរបាលរដ្ឋបាលសំបួរមាស បានស្រាវជ្រាវឃើញថា នៅចំណុចជិតវិហារសាសនាព្រះយេស៊ូគ្រិស្ត ស្ថិតនៅភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្ដាល មានរថយន្តដឹកដីដែលដឹកឆ្លងកាត់ ពីម្ខាងផ្លូវ ទៅចាក់បំពេញម្ខាងផ្លូវទៀត ដែលបើកបរឆ្លងកាត់ផ្លូវលេខ ២៦១ ប្រហែល ៥០ម៉ែត្រ និងមានការជ្រុះដីខ្លះៗ ដែលធ្វើឱ្យហុយនៅពេលក្តៅ និងរអិលពេលមានភ្លៀងធ្លាក់ ពិតប្រាកដមែន។ បន្ទាប់ពីពិនិត្យឃើញដូច្នេះ សមត្ថកិច្ចបានហៅតំណាងម្ចាស់អាជីវកម្មដឹកដី (ដោយម្ចាស់អាជីវកម្ម មិននៅ ជាប់ការងារតាមខេត្ត) មកធ្វើកិច្ចសន្យា និងអប់រំណែនាំ ដូចខាងក្រោម៖ ១.រថយន្តផ្ទុកដី មិនឲ្យលើសពីកំពស់ទ្រុង។ ២.គ្របឲ្យបានត្រឹមត្រូវ មុននឹងដឹកដីចេញពីរណ្ដៅដី។ ៣.ឲ្យអ្នកបើកបរ បើកបរក្នុងល្បឿនយឺតៗ នៅតំបន់ប្រជាជនរស់នៅនេះ។ ៤.ម្ចាស់អាជីវកម្មត្រូវរៀបចំអោយមានអ្នកជួយសម្រួលចរាចរណ៍ និងសម្អាតផ្លូវជាប្រចាំ។ អាស្រ័យហេតុនេះ សូមសាធារណជន ដែលប្រើប្រាស់បណ្តាញទំនាក់ទំនងសង្គមមេត្តាជ្រាប៕
