កម្ពុជាចាប់ផ្តើមចាកចេញជាផ្លូវការពីចំណាត់ក្រុមប្រទេសអភិវឌ្ឍន៍តិចតួច (LDC Category)
នាវេលាព្រឹក ថ្ងៃទី១៩ ខែធ្នូ ឆ្នាំ២០២៤ ឯកឧត្ដម កែវ ឈា ឯកអគ្គរាជទូត និងជាតំណាងអចិន្ត្រៃយ៍ កម្ពុជាប្រចាំអង្គការសហប្រជាជាតិ (អ.ស.ប.) អមដោយមន្ត្រីការទូត បានចូលរួមសម័យប្រជុំពេញ អង្គលើកទី៥៤ នៃមហាសន្និបាតអ.ស.ប.។
នៅក្នុងសម័ប្រជុំនៃមហាសន្និបាតអង្គការសហប្រជាជាតិលើកទី៧៩ នេះ បានអនុម័តជាឯកច្ឆ័នសម្រេចឱ្យកម្ពុជាចាប់ផ្តើមចាកចេញជាផ្លូវការពីចំណាត់ក្រុមប្រទេសអភិវឌ្ឍន៍តិចតួច (LDC Category) ក្នុងអំឡុងពេល ៥ ឆ្នាំ គិតចាប់ពីថ្ងៃអនុម័តសេចក្តីសម្រេចចិត្តនេះ។
ការចាកចេញពី LDCs Category នេះ មិនត្រឹមតែជាសមិទ្ធផលជាតិប៉ុណ្ណោះទេ តែវាថែមទាំងជាតំណាងឲ្យភាពជោគជ័យរួមនៃសាមគ្គីភាព និងភាពជាដៃគូសកល ដូចដែលបានចារឹកទុកនៅក្នុងរបៀបវារៈឆ្នាំ២០៣០ សម្រាប់ការអភិវឌ្ឍន៍ប្រកបដោយចីរភាព។ មិនត្រឹមតែប៉ុណ្ណោះ កត្តានេះ ក៏នឹងផ្តល់ឱ្យកម្ពុជានូវផែនទីបង្ហាញផ្លូវជាក់លាក់មួយ ដើម្បីប្រែក្លាយប្រទេសកម្ពុជាទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០។
ខណៈដែលយើងអបអរសាទរសមិទ្ធផលនាពេលនេះ កម្ពុជា ក៏មិនភ្លេចពីបញ្ហាប្រឈមមួយចំនួនផងដែរ រួមមានការបាត់បង់ការទទួលបាននូវការអនុគ្រោះពន្ធនាំចេញ និងលក្ខខណ្ឌអនុគ្រោះក្នុងការទទួលបានហិរញ្ញប្បទានសម្បទាន ជាដើម។ ក្នុងន័យនេះ កម្ពុជា សូមអំពាវនាវឱ្យសហគមន៍អន្តរជាតិ បន្តការគាំទ្រខ្លួននៅក្នុងដំណើរការចាកចេញពី LDC Category របស់កម្ពុជាដោយរលូន តាមរយៈគំនិតផ្តួចផ្តើមកសាងសមត្ថភាព និងយន្តការហិរញ្ញវត្ថុផ្សេងៗប្រកបដោយភាពច្នៃប្រឌិត។
ទន្ទឹមនឹងនេះ កម្ពុជា ក៏ប្តេជ្ញានឹងធានាឱ្យបាននូវដំណាក់កាលអន្តរកាលដ៏រលូន និងមាននិរន្តភាពមួយ តាមរយៈការធ្វើពិពិធកម្មសេដ្ឋកិច្ចដ៏រឹងមាំ ការពង្រឹងសមត្ថភាពស្ថាប័ន និងការចូលរួមកាន់តែស៊ីជម្រៅជាមួយភាពជាដៃគូក្នុងតំបន់ និងពិភពលោក។
ប្រភព៖Permanent Mission of the Kingdom of Cambodia to the United Nations-