ឯកឧត្តម ខៀវ កាញារីទ្ធ កោតសរសើរក្រុមហ៊ុន CBS ក្នុងការចូលរួមផ្សព្វផ្សាយព័ត៌មាន នៃសេចក្តីណែនាំផ្សេងៗរបស់រាជរដ្ឋាភិបាល ក្នុងវិធានការគ្រប់គ្រងការស្ថានការណ៍ការឆ្លងរីករាលដាលនៃជំងឺកូវីដ-១៩
ភ្នំពេញ៖ ចេញផ្សាយ ថ្ងៃពុធ ៩រោច ខែពិសាខ ឆ្នាំឆ្លូវ ត្រីស័ក ព.ស ២៥៦៥, ត្រូវនឹងថ្ងៃទី ៥ ខែ ឧសភា ឆ្នាំ២០២១។
ភ្នំពេញ៖ ថ្ងៃទី០៥ ខែឧសភា ឆ្នាំ២០២១
ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានបានកោតសរសើរចំពោះក្រុមហ៊ុន CBS ដែលបានចូលរួមចំណែកជួយផ្សព្វផ្សាយព័ត៌មាន ក៏ដូចជាការផ្សាយនូវសេចក្តីណែនាំសំខាន់ៗនិងវិធានការនានារបស់រាជរដ្ឋាភិបាល ក្នុងវិធានការគ្រប់គ្រងសភាពការណ៍ នៃការឆ្លងរីករាលដាលនៃជំងឺកូវីដ-១៩នេះ។ ការលើកឡើងរបស់ឯកឧត្ដមរដ្ឋមន្ដ្រីក្រសួងព័ត៌មាននេះ ក្នុងឱកាសដែលលោក Rajveer Singh ជានាយកប្រតិបត្តិថ្មី របស់ស្ថានីយទូរទស្សន៍ CTN, MYTV, CNC និង CBS Digitals មកបំពេញកិច្ចការងារ ក្នុងវិស័យព័ត៌មាន និងផ្សព្វផ្សាយនៅកម្ពុជា និងបានចូលជួបសម្តែងការគួរសមជាមួយ ឯកឧត្តមរដ្ឋមន្ត្រី កាលពីព្រឹកថ្ងៃទី០៥ ខែឧសភា ឆ្នាំ២០២១ នាទីស្តីការក្រសួងព័ត៌មាន។
ឯកឧត្តម ខៀវ កាញារីទ្ធ បានលើកឡើងថា ក្នុងរយៈពេលកន្លងមកនេះ ក្រសួងព័ត៌មាន និងស្ថានីយទូរទស្សន៍ CTN, MYTV, CNC មានទំនាក់ទំនងការងារគ្នាបានល្អ ហើយក្នុងដំណាក់កាលនៃការកើតមានជំងឺកូវីដ-១៩ ក៏ពិនិត្យឃើញថា បុគ្គលិករបស់ក្រុមហ៊ុន CBS បានបំពេញកិច្ចការងារជាច្រើន ដើម្បីជាគុណប្រយោជន៍ ក្នុងការផ្សាយព័ត៌មានពិតជូនដល់ប្រជាជនកម្ពុជា។ ឯកឧត្ដមរដ្ឋមន្ដ្រីបានចាត់ទុកការផ្សាយព័ត៌មានពិតគឺរំងាប់បាននូវអារម្មណ៍របស់ប្រជាជន ក៏ដូចជាជួយផ្សាយនូវសេចក្តីណែនាំសំខាន់ៗរបស់រាជរដ្ឋាភិបាល ក្នុងវិធានការគ្រប់គ្រងសភាពការណ៍ នៃការឆ្លងរីករាលដាលនៃជំងឺកូវីដ-១៩ នៅកម្ពុជាផងដែរ។
លោក Rajveer Singh បានសម្ដែងការរីករាយដែលបានមកបំពេញបេសកកម្មការងារនៅក្រុមហ៊ុន CBS ហើយលោកពិនិត្យឃើញថា បុគ្គលិកសុទ្ធតែសកម្ម ពោរពេញទៅដោយគំនិតច្នៃប្រឌិតថ្មី។ លោកនាយកប្រតិបត្តិថ្មីសង្ឃឹងថា តាមរយៈកិច្ចសហប្រតិបត្តិការរវាងក្រុមហ៊ុន CBS និងក្រសួងព័ត៌មានបានកាន់តែល្អប្រសើរបន្ថែមទៀត។
គួរបញ្ជាក់ដែរថា លោក Rajveer Singh ធ្លាប់បានបំពេញការងារនៅប្រទេស សិង្ហបុរី និងតាមបណ្តាប្រទសមួយចំនួននៅតំបន់អាស៊ី និងអឺរ៉ុប៕
www.information.gov.kh Sourcing
