ឯកឧត្ដម ឃួង ស្រេង៖ ស្ថានភាពទឹកជំនន់នៅតាមដងស្ទឹងព្រែកត្នោត នារសៀលថ្ងៃទី ២៦ខែតុលានេះ មានសភាពនឹង ដែលនឹងឈានទៅដល់ការស្រកចុះបណ្តើរៗ
ចេញផ្សាយថ្ងៃអង្គារ៍ ៥រោច ខែអស្សុជ ឆ្នាំឆ្លូវ ត្រីស័ក ព.ស ២៥៦៥, ត្រូវនឹងថ្ងៃទី ២៦ ខែ តុលា ឆ្នាំ២០២១។
ភ្នំពេញ ថ្ងៃទី២៦ ខែតុលា ឆ្នាំ២០២១
ឯកឧត្ដម ឃួង ស្រេង អភិបាលរាជធានីភ្នំពេញបានគូសបញ្ជាក់ថា ស្ថានភាពទឹកជំនន់នៅតាមដងស្ទឹងព្រែកត្នោត នារសៀលថ្ងៃទី ២៦ ខែតុលានេះ គឺមានសភាពនឹង ហើយនឹងឈានទៅដល់ការស្រកចុះបណ្តើរៗ។ ប៉ុន្តែទោះបីជាយ៉ាងណាក្តី អាជ្ញាធររាជធានីភ្នំពេញសហការជាមួយក្រសួងធនធនទឹក និងឧតុនិយម អាជ្ញាធរទន្លេសាប និងកងអង្គរក្សសម្ដេចតេជោ ហ៊ុន សែន នៅតែបន្តធ្វើសកម្មភាពទប់ទំនប់ ដើម្បីធ្វើយ៉ាងណាទប់ស្កាត់ ឱ្យបាននូវការបាក់ទំនប់ បង្កគ្រោះមហន្តរាយដល់ប្រជាពលរដ្ឋ។ ការបញ្ជាក់របស់ឯកឧត្ដមអភិបាលរាជធានីភ្នំពេញនេះ ក្នុងខណៈឯកឧត្ដមដឹកនាំអាជ្ញាធរកម្លាំងមានសមត្ថកិច្ចទប់ទំនប់ការពារទឹកជំនន់ ចាប់តាំងពីព្រឹក រហូតមកដល់រសៀលថ្ងៃទី២៦ ខែតុលានេះ នៅក្នុងភូមិសាស្ត្រខណ្ឌដង្កោ រាជធានីភ្នំពេញ។
បើតាមការលើកឡើងរបស់ឯកឧត្ដម ឃួង ស្រេង បានឱ្យដឹងថា គិតមកដល់រសៀលថ្ងៃទី២៦នេះ គឺស្ថានភាពទឹកនៅខេត្ដកំពង់ស្ពឺបានស្រកចុះចំនួន២ហ៊ុនហើយ។ ដោយឡែកសម្រាប់រាជធានីភ្នំពេញវិញ ទឹកមានស្ថានភាពនៅនឹង។
ជាមួយគ្នានេះដែរ អាជ្ញាធររាជធានីភ្នំពេញក៏ដូចជាអាជ្ញាធរខណ្ឌដង្កោ បានធ្វើការអំពាវនាវឱ្យបងប្អូនប្រជាពលរដ្ឋ ត្រូវមានការប្រុងប្រយ័ត្នខ្ពស់ដើម្បីត្រៀមទប់ទល់ជាមួយនឹងស្ថានភាពទឹកដែលបានហក់ឡើងឡើងនេះ ជាពិសេសត្រៀមធ្វើការបញ្ជូនកុមារ ឬក្មេងតូចៗ និងចាស់ជរាទៅកាន់ទីទួលសុវត្ថិភាព៕
www.information.gov.kh
