សម្តេចតេជោ និងសម្តេចកិត្តិព្រឹទ្ធបណ្ឌិត ផ្តល់អំណោយសប្បុរសធម៌ដល់ទារកទារិកាភ្លោះបី លើកទី៣៦៥ និងទី៣៦៦នៅរាជធានីភ្នំពេញ

ភ្នំពេញ៖ ចេញផ្សាយ ថ្ងៃពុធ ១១កើត ខែអាសាឍ ឆ្នាំជូត ទោស័ក ព.ស ២៥៦៤, ត្រូវនឹងថ្ងៃទី១ ខែកក្កដា ឆ្នាំ២០២០។

ទារក ទារិកាភ្លោះបីនាក់ ចំនួន២គ្រួសារផ្សេងគ្នាដែលត្រូវជាចៅៗរបស់សម្តេចតេជោ ហ៊ុនសែននាយករដ្ឋមន្ត្រីព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែនប្រធានកាកបាទក្រហមកម្ពុជា បានទទួលអំណោយដ៏សប្បុរសធម៌ពីសម្តេចទំាង២ ដោយ ទទួលបានទឹកប្រាក់ចំនួន ៥លានរៀល អង្ករ៥០គីឡូក្រាម ទឹកដោះគោម្សៅឌុយម៉ិក២កេសធំ ស្មើនឹង៤៨កំប៉ុង ស្កសរ៥គីឡូក្រាម សារុង២ និងក្រម៉ា២ ក្នុងមួយគ្រួសារៗ ស្មើៗគ្នា។
ឯកឧត្តម សេង ទៀង ជំនួយការផ្ទាល់សម្តេចតេជោនាយករដ្ឋមន្ត្រី បានអញ្ជើញនាំយកអំណោយដ៏សប្បុរធម៌ទាំងអស់នោះ ទៅចែកជូនផ្ទាល់ដៃដល់គ្រួសារកូនភ្លោះទាំងពីរគ្រួសារនោះ ដល់លំនៅដ្ឋានកូនភ្លោះ និងនៅមន្ទីរពេទ្យកាល់ម៉ែត្រនៅថ្ងៃទី១ខែកក្កដា។ ក្នុងនោះគ្រួសារទារកភ្លោះទី១ មានលំនៅដ្ឋានស្ថិតនៅផ្ទះលេខ ១៩អ៊ី ផ្លូវ៣៧១ ភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ ទារកភ្លោះទាំងបីនាក់នេះ ជាកូនលើកទី៣ របស់ឪពុកឈ្មោះ អ៊ុយ តាំងកា អាយុ៤២ឆ្នាំ ម្តាយឈ្មោះ ហែម មរកត អាយុ៣៦ឆ្នាំ អ្នកទាំងពីរមានមុខរបរលក់ដូរ ដែលមានលំនៅដ្ឋានរស់នៅឃុំថ្មគោលស្រុកសង្កែ ខេត្តបាត់ដំបង។ ទារកភ្លោះទាំង៣នាក់នេះ ប្រសូត្រកាលពីថ្ងៃទី៤ ខែមិថុនា ឆ្នាំ២០២០ នៅមន្ទីរពេទ្យកាល់ម៉ែត្រ។
ដោយឡែកគ្រួសារកូនភ្លោះ៣ទី២ ប្រសូត្រកាលពីថ្ងៃទី១៧ ខែមិថុនា ឆ្នាំ២០២០ មានស្រី២នាក់ ប្រុសម្នាក់ជាកូនលើកទី៤ របស់ឪពុកឈ្មោះ ថាច់ សូរិន អាយុ៣៤ឆ្នាំ មុខរបរជាមន្ត្រីរាជការ នៃមន្ទីរកសិកម្ម រុក្ខាប្រមាញ់ និងនេសាទ ខេត្តស្វាយរៀង និងម្តាយឈ្មោះ ពេជ្រ ស្រីមុំ អាយុ៣៣ឆ្នាំ មានមុខរបរលក់ដូរ ដែលមានទីលំនៅរស់នៅភូមិស្វាយរៀង សង្កាត់ស្វាយរៀង ក្រុងស្វាយរៀង ខេត្តស្វាយរៀង។
ក្នុងឱកាសនោះឯកឧត្តម សេង ទៀង មានប្រសាសន៍ពាំនាំនូវការផ្តាំផ្ញើរសាកសួរសុខទុក្ខ ដោយសេចក្តីនឹករលឹកយ៉ាងជ្រាលជ្រៅបំផុត ពីសម្តេចតេជោនិងសម្តេចកិត្តិព្រឹទ្ធបណ្ឌិត ដែលជានិច្ចកាលសម្តេចទាំងទ្វេ តែងតែផ្ញើនូវការនឹករលឹកចំពោះប្រជាពលរដ្ឋ នៅគ្រប់ទីកន្លែងទាំងអស់ ក្នុងប្រទេសកម្ពុជា។ ឯកឧត្តមមានប្រសាសន៍បន្តថាជំនួយឧបត្ថម្ភទាំងអស់នេះ មិនមែនជាអំណោយរបស់រាជរដ្ឋាភិបាល អំណោយរបស់កាកបាទក្រហមកម្ពុជា ឬអំណោយរបស់គណបក្ស ដែលបំរើឲ្យសកម្មភាពនយោបាយនោះទេ ផ្ទុយទៅវិញអំណោយទាំងអស់នេះ គឺជាអំណោយទានកើតចេញពីទឹកចិត្តជ្រះថ្លាប្រកបដោយការគិតគួរខ្ពស់របស់សម្តេចតេជោនិងសម្តេចកិត្តិព្រឹទ្ធបណ្ឌិត ដែលបានឈ្វេងយល់ពីការលំបាកពិតប្រាកដ ចំពោះប្រជាពលរដ្ឋដែលមានប្រសូត្រទារកភ្លោះបីឬបួននាក់ពិតប្រាកដ។
សូមបញ្ជាក់ថាចាប់តាំងពីឆ្នាំ១៩៩៩រហូតមកដល់បច្ចុប្បន្ននេះ មានគ្រួសារប្រសូត្រទារកភ្លោះបីនាក់ឫបួននាក់ ចំនួន៣៦៥គ្រូសារហើយ បានទទួលអំណោយឧបត្ថម្ភដ៏សប្បុរសធម៌ ពីសម្តេចតេជោនិងសម្តេចកិត្តិព្រឹទ្ធបណ្ឌិត ក្នុងការជួយទំនុកបំរុង ដល់ការលំបាកខ្វះខាតក្នុងជីវភាពរស់នៅប្រចាំថ្ងៃ ពិសេសការចិញ្ចឹមបីបាច់ទារកភ្លោះបីនាក់ ដែលជាចៅៗរបស់សម្តេចទាំងទ្វេនៅពេលឆ្លងទន្លេរួច។
បន្ថែមពីនេះទៀតក៏មានចំនួនគ្រួសារទារកភ្លោះបីនាក់នេះមានច្រើនជាងនេះទៀត ដែលសម្តេចតេជោនិងសម្តេចកិត្តិព្រឹទ្ធបណ្ឌិត បានឧបត្ថម្ភតាមរយៈអ្នកតំណាងរាស្រ្ត និងក្រុមការងារចុះជួយប្រជាពលរដ្ឋនៅតាមមូលដ្ឋានភូមិ ឃុំ ស្រុក រាជធានី-ខេត្ត កាលពីមុនឆ្នាំ១៩៩៩៕

ប្រភព www.information.gov.kh