ការលក់ រថយន្តអគ្គិសនី EV ធ្លាក់ចុះ ៣៥% នៅឆមាសទី១
ការលក់ រថយន្តអគ្គិសនី EV ធ្លាក់ចុះ ៣៥% នៅឆមាសទី១
ការលក់រថយន្តអគ្គិសនីកម្រិតខ្ពស់ (Sales of premium electric vehicles) (EVs) នៅក្នុងប្រទេសថៃបានធ្លាក់ចុះ ៣៥% ពីមួយឆ្នាំទៅមួយឆ្នាំក្នុងអំឡុងឆមាសទីមួយនៃឆ្នាំនេះ ប៉ុន្តែក្រុមហ៊ុនផលិតរថយន្តប្រណីតរបស់អាល្លឺម៉ង់ BMW នៅតែមានភាពវិជ្ជមានចំពោះការលក់រថយន្ត EV របស់ខ្លួន ដោយម៉ូដែលដែលទើបនឹងចេញថ្មីនៅក្នុងគ្រួសារ Mini ក្នុងទីក្រុងបាងកកត្រូវបានរំពឹងទុកថានឹងទាក់ទាញការចាប់អារម្មណ៍ពីសាធារណជន។
លោក Krisda Utamote អតីតប្រធានក្រុមហ៊ុន Electric Vehicle Assocation of Thailand (EVAT) និងនាយកក្រុមហ៊ុន BMW Group Thailand សម្រាប់ទំនាក់ទំនងសាជីវកម្មបានកត់សម្គាល់ថា មានការធ្លាក់ចុះនៃការលក់រថយន្ត EV ពិសេសមកត្រឹម ៣,៨៤៤ គ្រឿងនៅចន្លោះខែមករា និងខែមិថុនាឆ្នាំនេះ។
លោក Krisda បានបន្តទៀតថា “បញ្ហាចម្បងគឺបណ្តាលមកពីលក្ខណៈវិនិច្ឆ័យតឹងរ៉ឹងរបស់ធនាគារ (banks’ stricter criteria) ក្នុងការផ្តល់ប្រាក់កម្ចីរថយន្តដែលប៉ះពាល់ដល់កម្លាំងទិញរបស់ប្រជាជន និងការធ្លាក់ចុះនៃសេដ្ឋកិច្ចដែលជះឥទ្ធិពលដល់ឧស្សាហកម្មរថយន្ត”។
លោកបានបន្ថែមថា ការលក់រថយន្តសរុប រួមទាំងរថយន្ត EV និងរថយន្តដែលប្រើម៉ាស៊ីនចំហេះខាងក្នុង នៅក្នុងប្រភេទរថយន្តប្រណិតក៏បានថយចុះ ២៥% ពីមួយឆ្នាំទៅមួយឆ្នាំមកត្រឹម ១៦,០០០ គ្រឿង។ នេះផ្ទុយស្រឡះជាមួយនឹងការលក់សរុបនៅក្នុងផ្នែកដូចគ្នាក្នុងឆ្នាំ ២០២៣ ដែលបានកើនឡើង ២៥% ពីមួយឆ្នាំទៅមួយឆ្នាំដល់ ៤០,៤០៦ យូនីត ពោលគឺកើនឡើងពី ៣២,៣២៥ គ្រឿងក្នុងឆ្នាំ ២០២២។
សមាគមយានយន្តអគ្គិសនីថៃ (The Electric Vehicle Association of Thailan) ហៅកាត់ថា EVAT រំពឹងថានឹងមានការកើនឡើងនៃសេដ្ឋកិច្ចនៅពាក់កណ្តាលចុងក្រោយនៃឆ្នាំ ២០២៤ ដែលជំរុញដោយវិស័យទេសចរណ៍ និងការពន្លឿនការចំណាយរបស់រដ្ឋាភិបាលនៃថវិកាសារពើពន្ធឆ្នាំ ២០២៤ របស់ខ្លួន។
លោក Krisda បានមានប្រសាសន៍ថា “ឧស្សាហកម្មរថយន្តសង្ឃឹមថាកត្តាទាំងនេះនឹងរួមចំណែកដល់ការធ្វើឱ្យប្រសើរឡើងនៃសេដ្ឋកិច្ចបើប្រៀបធៀបទៅនឹងឆមាសទី១នៃឆ្នាំនេះ” ។ គាត់ថ្លែងនៅពេលដែល BMW Group Thailand ណែនាំម៉ូដែល Mini ថ្មីទៅកាន់ទីផ្សារប្រទេសថៃ រួមទាំង Mini Countryman SE អគ្គិសនីពេញលេញផងដែរ។
នៅចន្លោះខែមករា និងខែមិថុនា ក្រុមហ៊ុន BMW Group Thailand បានឃើញការកើនឡើងនៃការលក់រថយន្ត EV លើសពី ៤០% រថយន្ត EV សរុបចំនួន ៩៥០ ត្រូវបានចុះបញ្ជីពេញមួយរយៈពេល ៦ខែនេះ។
លោក Rene Gerhard ប្រធាន និងជានាយកប្រតិបត្តិនៃក្រុមហ៊ុន BMW Group Thailand បាននិយាយថា ក្រុមហ៊ុនមិនទាន់កំណត់គោលដៅលក់រថយន្តខ្នាតតូចនៅក្នុងប្រទេសថៃនៅឡើយទេ ដោយសារវាអាស្រ័យលើលក្ខខណ្ឌទីផ្សារចំពេលបរិយាកាសសេដ្ឋកិច្ចបច្ចុប្បន្ន។ លោកបានបន្តថា៖ «យើងជឿជាក់ថារថយន្ត Mini នឹងទាក់ទាញអតិថិជនថៃដោយសារតម្លៃរបស់ពួកគេស្របតាមស្ថានភាពសេដ្ឋកិច្ចបច្ចុប្បន្ន។
BMW បានបែងចែកថវិកាវិនិយោគរបស់ខ្លួនទៅឱ្យរោងចក្រផលិតរថយន្ត EV របស់ក្រុមហ៊ុននៅក្នុងប្រទេសចិន ដែលផលិតរថយន្ត EV រួមទាំងរថយន្ត Mini សម្រាប់ការនាំចេញពីប្រទេសចិនទៅកាន់ប្រទេសថៃក្រោមកិច្ចព្រមព្រៀងពាណិជ្ជកម្មសេរីអាស៊ាន-ចិន។
ចេញផ្សាយ : ថ្ងៃអង្គារ ៣ រោច ខែអាសាឍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៣ ខែកក្កដា ឆ្នាំ២០២៤
ប្រភព : Bangkok post
សម្រួលអត្ថបទដោយ : លោក. នាង រុន ( ឯករាជ្យ៧ )
