បាតុកម្មនៅថៃ រវាងនិស្សិតក្រុមប្រឆាំង និងក្រុមការពាររដ្ឋាភិបាល
បាតុកម្មនៅថៃ រវាងនិស្សិតក្រុមប្រឆាំង និងក្រុមការពាររដ្ឋាភិបាល
ភ្នំពេញ៖ ចេញផ្សាយ ថ្ងៃអង្គារ៍ ៧រោច ខែស្រាពណ៍ ឆ្នាំជូត ទោស័ក ព.ស ២៥៦៤, ត្រូវនឹងថ្ងៃទី១១ ខែសីហា ឆ្នាំ២០២០។
ក្រុមប្រឆាំងតវ៉ាប្រជែងគ្នាបានលេចឡើងនៅក្នុងនិងម្តុំក្រុងបាងកកកាលពីថ្ងៃចន្ទទី១០សីហា ដោយបង្កើនកំដៅនយោបាយចំពេលមានការតវ៉ាប្រឆាំងរដ្ឋាភិបាលស្ទើររាល់ថ្ងៃនៅទូទាំងប្រទេសពីសំណាក់ក្រុមនិស្សិតនិងនាំអោយមានការបារម្ភអំពីការវិលទៅរកអំពើហិង្សាតាមដងវិថីសាជាថ្មី។
មនុស្សរាប់សិបនាក់បានជួបជុំគ្នានៅមុខសភាកាលពីថ្ងៃចន្ទ ដើម្បីគាំទ្ររដ្ឋាភិបាលរបស់ឧត្តមសេនីយ៍ ប្រាយុទ្ធ ចាន អូចា។តែនៅបន្តិចក្រោយមក មនុស្សរាប់ពាន់នាក់បានចូលរួមក្នុងបាតុកម្មប្រឆាំងរដ្ឋាភិបាលនៅសកលវិទ្យាល័យធម្មសាត នៅជាយក្រុងបាងកក ដែលជាបាតុកម្មនិស្សិតធំបំផុតប្រឆាំងនឹងរដ្ឋាភិបាលរបស់លោកប្រាយុទ្ធ។
ក្នុងសញ្ញាបង្ហាញការប្រឆាំងពួកនិស្សិតក្រោមការសម្របសម្រួលមួយ អតីតសកម្មជនជាយនិយមលោកស៊ូមេត ត្រាគុលវូននូ បានប្រកាសបង្កើតក្រុមគាំទ្ររដ្ឋាភិបាលមួយឈ្មោះថា មជ្ឈមណ្ឌលនៃក្រុមនិស្សិតការពារស្ថាប័នជាតិ(CVPI)។លោកស៊ូមេតបាននិយាយថា «មនុស្សមួយក្រុមកំពុងញុះញង់មនុស្សក្មេងៗអោយចេញមកវាយប្រហារយោធា រដ្ឋាភិបាលនិងនិយាយប៉ះពាល់របបរាជានិយម។ទង្វើបែបនេះអាចនាំដល់អំពីហិង្សានិងការបំផ្លាញប្រព័ន្ធអភិបាលកិច្ចនិងវប្បធម៌របស់យើង។យើងបង្កើតក្រុមនេះឡើងដើម្បីរំលឹកដល់ពួកយុវជន ឪពុកម្តាយនិងគ្រូបង្រៀន រួមទាំងមន្ត្រីរាជការអំពីគ្រោះថ្នាក់ដល់ប្រទេសជាតិចេញពីក្រុមមនុស្សប្រភេទនេះ»។
តែពួកនិស្សិតចោទប្រកាន់ក្រុមបាតុករគាំទ្ររដ្ឋាភិបាលថាព្យាយាមបង្កបង្កើតការប្រឈមមុខដែលនឹងនាំដល់អន្តរាគមន៍យោធាមួយទៀត។និក ស្ថាណាវីត សកម្មជននិស្សិតមកពីសកលវិទ្យាល័យ មហាសារ៉ាខាម បានប្រាប់ទៅកាន់ហ្វូងមនុស្សតថា «ពួកគេរៀបចំធ្វើបាតុកម្មប្រឆាំងបកដើម្បីបង្កើតស្ថានភាពមួយដែលអាចនាំដល់រដ្ឋប្រហារមួយទៀត។យើងមិនចង់បានស្ថានភាពបែបនេះទេហើយនឹងប្រឆាំងវា»។
សូមបញ្ជាក់ថា បាតុកម្មប្រឆាំងរដ្ឋាភិបាលថៃកាន់តែមានសម្ទុះកើនឡើងដោយបាតុករទាមទារអោយរដ្ឋាភិបាលរបស់លោកប្រាយុទ្ធចុះចេញពីតំណែង បង្កើតរដ្ឋធម្មនុញ្ញថ្មីមួយនិងបោះឆ្នោតឡើងវិញ។ពួកគេមានម្តងម្កាលបាននិយាយប៉ះពាល់របបរាជានិយម ដែលជាប្រធានបទរសើបបំផុតនិងត្រូវហាមឃាត់នៅថៃ។ក្នុងការជួបជុំតវ៉ាមួយ វាគ្មិនម្នាក់បានអំពាវនាវអោយមានការកែទំរង់របបរាជានិយម។
ប្រឈមនឹងសម្ពាធដូច្នេះ ឧត្តមសេនីយ៍ប្រាយុទ្ធ បាននិយាយថា រដ្ឋាភិបាលកំពុងរកវិធីអោយបណ្តាក្រុមនយោបាយសម្តែងទស្សនៈរបស់គេ តែលោកបានសម្តែងការព្រួយបារម្ភអំពីការប្រឈមមុខគ្នា។
ប្រតិកម្មរបស់អាជ្ញាធរចំពោះកាតុកម្មប្រឆាំងរដ្ឋាភិបាលនៅមានកំរិត តែសកម្មជន២នាក់ត្រូវបានចាប់ខ្លួនកាលពីសប្តាហ៍មុន ពីបទដឹកនាំបះបោរនិងរំលោភច្បាប់ហាមការជួបជុំដើម្បីប្រឆាំងជំងឺឆ្លងកូវីដ១៩៕
ប្រភព៖www.rasmeinews.com
