ក្រសួងសុខាភិបាល៖ នៅវត្តនាងខ្មៅ មានករណីព្រះសង្ឃ ២៨ អង្គ អាពាធ គ្រាន់តែមានជំងឺផ្តាសាយឆ្លងតគ្នាប៉ុណ្ណោះ

ភ្នំពេញ៖ ចេញផ្សាយ ថ្ងៃព្រហស្បតិ៍ ២កើត ខែភទ្របទ ឆ្នាំជូត ទោស័ក ព.ស ២៥៦៤, ត្រូវនឹងថ្ងៃទី២០ ខែសីហា ឆ្នាំ២០២០។

ភ្នំពេញ៖ ក្រសួងសុខាភិបាល បានប្រកាសឱ្យដឹង នៅថ្ងៃទី១៩ ខែសីហា ឆ្នាំ២០២០នេះថាៈ ករណីព្រះសង្ឃ ២៨ អង្គ គង់នៅវត្តនាងខ្មៅ ស្ថិតក្នុងភូមិចា ឃុំរវៀង ស្រុកសំរោង ខេត្តតាកែវ គឺគ្រាន់តែមាន ជំងឺផ្ដាសាយ ឆ្លងតគ្នាប៉ុណ្ណោះ ដូច្នេះសូមប្រជាពលរដ្ឋ និងអ្នកប្រើប្រាស់ បណ្តាញសង្គម កុំមានការភ្ញាក់ផ្អើល។

លោកស្រី យក់ សម្បត្តិ រដ្ឋលេខាធិការ ក្រសួងសុខាភិបាល បានបញ្ជាក់ថាៈ ករណីព្រះសង្ឃ ២៨ អង្គ គង់នៅវត្តនាងខ្មៅ ស្ថិតក្នុងភូមិចា ឃុំរវៀង ស្រុកសំរោង ខេត្តតាកែវ គឺគ្រាន់តែមាន ជំងឺផ្ដាសាយ ឆ្លងតគ្នាប៉ុណ្ណោះ ដូច្នេះសូមប្រជាពលរដ្ឋ និងអ្នកប្រើប្រាស់ បណ្តាញសង្គម កុំមានការភ្ញាក់ផ្អើល។

បើតាមប្រសាសន៍របស់លោកស្នងការរង ផែនសន្តិសុខ នៃស្នងការដ្ឋាននគរបាល ខេត្តតាកែវ បានឱ្យដឹងថា ក្រោយពីទទួល បានព័ត៌មាន ពាក់ព័ន្ធនឹងព្រះសង្ឃ ២៨ អង្គ នៅវត្តនាងខ្មៅ លោក បានសហការជាមួយ អាជ្ញាធរពាក់ព័ន្ធ ជាពិសេស ជាមួយក្រុមគ្រូពេទ្យ បានចុះដល់ទីតាំងវត្តនោះ ។ បន្ទាប់ពីបានពិនិត្យសុខភាព ព្រះសង្ឃទាំងនោះរួច ក្រុមគ្រូពេទ្យ បានបញ្ជាក់ពីលទ្ធផល នៃការពិនិត្យថាៈ ព្រះសង្ឃ មានជំងឺផ្ដាសាយ សរុបចំនួន ២៨ អង្គ អាជ្ញាធរ ស្នើសុំឲ្យព្រះសង្ឃ ទាំងនោះ គង់នៅក្នុងកុដិ ។ ដោយឡែក ពួកគាត់ ត្រៀមខ្លួនសហការ តាមជំនាញរបស់សុខាភិបាល ដើម្បីធ្វើចត្តាឡីស័ក ។

លោកស្នងការរង ផែនសន្តិសុខ នៃស្នងការដ្ឋាននគរបាល ខេត្តតាកែវ អភិបាលរងស្រុកសំរោង ប្រធានមន្ទីរពេទ្យបង្អែក ស្រុកសំរោង និងមេឃុំរវៀង ដែលបានអញ្ជើញចុះទៅដល់ទីតាំងវត្តនាខ្មៅនោះ បានប្រាប់ឱ្យដឹងថា៖ ព្រះចៅអធិការវត្ត និងព្រះសង្ឃផ្សេងទៀត មានអាការៈផ្ដាសាយ ហើយទៅព្យាបាល នៅផ្ទះគ្រូពេទ្យ ជាប់វត្ត ដែលជាគ្រូពេទ្យប្រចាំ ជាបន្តបន្ទាប់ ហើយគ្រូពេទ្យ មិនយកថវិកា ទើបចៅអធិការវត្ត បង្ហោះសារ ក្នុងបណ្ដាញសង្គម ថ្លែងអំណរគុណ ដល់គ្រូពេទ្យ ហើយប្រជាពលរដ្ឋ ក៏យកព័ត៌មាន ដែលចៅអធិការវត្ត បង្ហោះនោះ ផ្សព្វផ្សាយបន្តគ្នា ធ្វើឲ្យមានភាពភ្ញាក់ផ្អើល រហូតមានការទំនាក់ទំនង ចូលទៅលេខ ១១៥ សុំអន្តរាគមន៍ ចុះពិនិត្យតែម្តង។

សូមបញ្ជាក់ថា គិតត្រឹមម៉ោង ០៧៖០០ ព្រឹក ថ្ងៃទី១៩ ខែសីហា ឆ្នាំ២០២០ នៅកម្ពុជា មិនមានអ្នកឆ្លងថ្មី វីរុសកូវីដ ១៩ ទេ ក៏ប៉ុន្តែមានអ្នកជាសះស្បើយ ចំនួន ១៣ នាក់ ។ ដូចនេះ បើសរុបនៅទូទាំងប្រទេស កម្ពុជាបានរកឃើញអ្នកឆ្លងវីរុសកូវីដ-១៩ ចំនួនសរុប ២៧៣នាក់ (ស្រី្ត ៥៤នាក់ និងបុរស ២១៩នាក់) ក្នុងនោះចំនួនអ្នកព្យាបាល ជាសះស្បើយ សរុបទូទាំងប្រទេស មានចំនួន២៥១នាក់ (ស្រី៥២នាក់ និងបុរស១៩៩នាក់) និង អ្នកសម្រាកព្យាបាល នៅក្នុងមន្ទីរពេទ្យរដ្ឋ និងឯកជន មានចំនួនសរុប ២២ នាក់ ៕